Valbjør gard driv gardsturisme på ein levande gard i full drift. Du kan overnatte i hus med historie i veggane, men likevel med all komfort du forventar å finne i vår tid.
Les om husa du kan overnatte i
Garden ligg høgt og fritt på solsida i Nordherad i Vågå kommune. Her er det utsyn til det grøne Vågåvatnet og dei kvite toppane i Jotunheimen. Garden er freda og består av fleire fine gamle hus der det eldste er frå middelalderen. Historia sit i veggane og formidlast av folka på garden.
På Valbjør kan du oppleva tradisjonsrikt handverk som blestring og smiing, spinning og vidare bearbeiding av ull, skinnfellsaum, trearbeid med meir. Bebuarane på garden har kunnskap om mange handverk og dei har knytt til seg eit nettverk av vener og kjende som kan det dei ikkje meistrar like godt sjølv.
Det er ofte bygge- eller restaureringsarbeid i gang på garden. "Nye" gamle hus blir flytt til garden og dei som står der treng restaurering. I sommar (2009) er det eit kvennhus som står for tur.
Garden har eigen gardsbutikk med mat og handverk, ein fin gardshage og urtehage. Garden har økologisk drift med sau og geit.
Grenda Nordherad er eit av dei 20 kulturlandskapa som er peika ut som nasjonale satsingsområde. Det er eit godt merka stignett gjennom grenda for dei som vil ta små eller store turar til fots.
